www.internetpk.com
 
 
 Urdu Quotes
 Jokes
 Lyrics
 Mobile Phones
 Coaching Centre
 Postal Codes
 Poetry
 Beauty Tips
 Articles
 Health
 
 

Home Treatment of Eczema

Eczema is an chronic skin disease and problem where inflammation on the outer layer of the skin happens and eczema affects of all ages people, there are solutions and homemade treatment of Eczema so you will find and read online free home remedies Eczema in Urdu and Hindi.
 
 
 
 
 

Eczema:

Eczema se murad jild ki diddat hai jis mein ibtadai eshteaal ke baad chote chote dane aable peda ho jate hein. Jild ki bimariyon mein ye sab se zyada la-haq hone wali nehayat taklef-da bimari hai. Eczema bunyadi tor per aik tabai marz hai jo jismani nizam mein zehrila pan peda ho jane ka natija hota hai. Es marz ki mutaadad eqsam hein. In mein aksaryat mazmin iqsam ki hoti hai.
Eczema ki shaded tareen sorat ki alamat jild ki surkhi aur sojan ke sath sath es per barek dane aur aablo ki mojodgi hai jin mein shaded jalan hoti hai. Agar dane aur aable phat jaein to aik gadhi ratobat ki papdi jild per jam jati hai. Jis mein se be-rang mada rasta rehta hai. Ye mazeed papdiyan tashkeel dene ka zariya ban jata hai. Eczema ke her marhale per kharish jari rehti hai. Ratubat rusne ke marhale mein es mein bacteria ke sath infection ho sakti hai. Kharish aur eshteal se majbor ho kar agar papdiyon ko chela jae to and-mal ka amal buri tarha mutasir hota hai. Chelne se na sirf infection phel jata hai balke mutasara muqam ka khushk aur mundamil hona bhi takher ki nazar ho jata hai.
Eczema ke asbab mein allergy aik aehum kirdar ada karti hai. Kuch khawateen ke hathon per Eczema detergent ya sabun se allergy ki wajha se la-huq ho jata hai jin se woh kapde ya bartan dhoti hein. Kuch khawateen ke ungliyon ke erd gird Eczema namodar ho jata hai. Es ka sabab woh allergy hoti hai jo inhein sone, chandi aur degar dhaton ki angothiyan pehanne se la-haq hoti hai. Saan antoniyon mein qaem university of Texas health science mein aik haliya tehqeq ke mutabiq aese bache jinhein Eczema la-haq tha in ki 75% maqdar ki mukhtalif ghezaon se allergy thi. Es marz ko tezi se peda karne wali allergy andon, mong phalli, chocolate, gandum, gae ke dodh, murghi aru aaloun se peda hoti hai. Eczema ka haqeqi sabab sabab albatta aik he hai aur woh hai insani nizam ka jism ke mukhtalif ikhraj ke raston se zehrila pan kharij karne mein na-kam rehna hai. Degar asbab mein naqis metabolism, qabz, ghezaiyat ki kami aur zehni dabao numaya hein.

Home Treatment of Eczema:

• Eczema se nimatne ka behtareen rasta apne khon ko saaf rakhna hai. Khon ki safai ke liye wahi tareqa kar hai jo jild ki dosri bimariyon ke zaman mein aap ke liye tajwez kiya jata hai. Elaj ka aaghaz sangtare ya malte ke juice ya pani ke roze se kiya jae. Ye roze marz ki shedat aur doraniye ke mutabiq 5 se 10 din tuk rakhe jane chahiye. Mazkora roze jism se zehrile mado ko kharij karne mein madad denge aur bhar-por andaz mein bahali sehat ko mumkin banaien ge. Baaz ouqat kuch afrad mein rozon ke ebtadai dino mein sorat-e-hal zyada shedat ikhtayar kar leti hai kyunke jild ke zariye fasid mado ke ikhraj mein ezafa ho jata hai lekin jab roze jari rakhe jate hein to behtari ke aasar numaya hone lagte hein.

• Juice ke roze ke baad agar sirf dodh ko gheza banaya jae to zyada ache nataej baramad hote hein. Es ke liye mareez ko pehle din aik chothai liter dodh her ghante ke baad dosre din pon ghante ke baad pher tesre aur baad ke dino mein aadhe ghante ke baad pina chahiye. Her roz piye jane wale dodh ki maqdar 6 liter honi chahiye. Sirf dodh pe mushtamil es gheza ka mamol 4 se 6 hafte tak aur agar zarori ho to es se bhi zyada arsa tak jari rakha ja sakta hai. Eczema ke bohat se marezo ko es tareqa kar yani juice fast aur pher dodh ki gheza ke zariye mukamal sehat mil chuki hai.

• Phal, namak ke bagher kachi ya bhap mein paki sabziyan aur in ke sath hole-mail bred ya chapatiyan dodh ki gheza ke marhale ke baad estamal mein laein. Gajar aur peth es bimari mein khas tor per muffed sabziyan hein. Khana pakane ke liye ghe ke bajae narial ka tail estamal kiya jae. Kuch dino ke baad mareez ko roz-marra ghezaoun pe laya jae. In ghezaoun mein bunyadi gheza group maslan beaj, phaliyan aur maghaz, sabziyan aur phal shamil hone chahiye. Khane ka bada hissa kachi ghezaoun pe mushtamil hona chahiye. Alfa alfa, mong aur soybean ke beaj ager phote howe hon to zyada mufeed rehte hein. Es gheza ke sath cold pressed vegetable oil, shehad aur khamer bhi ezafi tor per zarori hein. Juice ke roze 2 ya 3 mahine ke waqfe ke bad agar zarori ho to dohra liye jaein. Baher hal es ka inhasar sorat-e-hal mein behtari ki raftar per hai. Eczema ke mazamin aur zyada mushkil waqeaat mein marez ko pori tarha sehat-yab hone tak her hafta mein aik roz juice ka roza rakhna chahiye.

• Mareez ko chae, coffee, alcohol ke mashrobat aur tamam masalhon ke sath sath chini, mede ki masnoaat, pisse aur chahne howe anaj, polish kiye howe chawal aur daba band ghezaoun se mukamal parhez zarori hai. Mareez ko sirf aur sirf khalis aur mukamil ghezaein estamal karna chahiye.

• Kachi sabziyoun ke juices, khusosan gajar ka juice palak ke juice mein mila kar pina, Eczema ke elaj ke liye nehayat mufeed hai. In dono juices ke tanasub ka fomula 3:2 hai. Yani 300 mile liter gajar ka juice aur 200 mile liter palak ka juice mila kar estamal kiya jae. Ye majmoei tor per 500 mile liter yani nisf liter hoga.

• Eczema ke mareez ko jahan tak mumkin ho taza hawa mein rehna chahiye. Taza hawa ke hosul ke sath sath es bat ka khayal rakha jae ke kapde chust yani tang na hon. Tang kapron se bhi gurez zarori hai kyunke in se aik to jism ko hawa nahi lagti. Dosre doran-e-khon mein rukawat aati hai. Rozana 2 ya 3 liter pani zaror pina chahiye. Eczema ke mareez ko mosam ki munasbat se 2 ya 3 bar nahana bhi zarori hai. Mutasara hisson ke elawa jism ki tamam jild ko nahane se pehle hateliyon se achi tarha ragdein.

• Eczema se mutasara hisson pe narial ka tail lagaya jae. Es se jild ko narm rakhne mein madad mile gi. Antdiyon ko faal rakhne ke liye walking ya jogging ka mamol bhi zarori hai. Ghusal aaftabi yani dhop lena bhi mufeed hai kyunke es se nuqsanda Bactria halak ho jate hein. Dhoop mein rehne ka amal subha ke waqt munasib aur mozo rehta hai. Soraj ki pehli kirnein sehat bakhsh sabit hoti hein. Eczema se mutasara muqamat per matti ka halka phulka laip phe sehat bahal karne mein madad deta hai. Ye laep aik waqt mein 1 ghanta tak rakha jae aur ese din mein 2 ya 3 bar lagaya jae.

• Eczema ki shidat ho to thandi patiyan mutasara muqam per rakhein. Aik tareqa kar ke mutabiq mutasara hissa pe mota narm kapda lappet lein. Es kapre ko 55 ya 60 darje forn height darja hararat rakhne wale pani se gela karein. 2 ghante tak her 15 se 20 minute ke bad lapete howe kapde ki gadi ya patti per pani dalte rahein. Ye patti ya kapda esi tarha musalsal gela rehne dein. Mareez ko kharish ya dard mehsos hoga aur mumkin hai shedat bhi ho lekin ye kefiyat ibtada mein hogi aur pher batadrej khatam ho jae gi. Thande pani ki patti ya gadi ka estamal 1 hafta tak din mein 2 bar karein.

• Hafta mein agar 2 ya 3 bar bhap ka ghusal liya jae to es se zaberdast faeda hota hai. Khususi tor per es ka faeda sirf dodh ko gheza rakhne ke dino mein hota hai. 45 minute se 1 ghanta tak moat-ta-dil darja hararat rakhne wale sada pani mein jism duboe rakhna bhi bahali sehat mein madad deta hai.

• Moat-ta-dad gharelo elaj bhi Eczema se nijat ke liye moasar sabit hota hai. In mein se 1 pethey (halwa kadu) ka estamal hai jo sab se zyada moasar aur mufeed samjha jata hai. Es tareqa elaj mein sirf pethey per mushtamil gheza din mein 3 bar khai jati hai. Ye gheza 40 din tak barqarar rakhi jati hai.

• Aam (mango) bhi Eczema ke elaj ka aik moasar zariya hai. Es phal ka chilka aur guda aik cup pani mein 1 ghanta tak garam karein. Pher ese chan lein aur lotion ki tarha mutasara hisson pe khob lagain. Din mein kai bar ye lotion lagana Eczema ko teze se khushk karta hai.

• Ragi (Finger Millet) ke sabz patte, purane Eczema ke khatme ke liye zabardast shafi taseer rakhte hein. Taza patton ka juice mutasira hisson per lagane se jild sarat se sehat mand ho jati hai. Kai sayal jo fitri ejza se hasil hote hein, Eczema se mutasara hisson ko saf karne ke liye washing lotions ki hesiyat se estamal kiye jate hein. In mein neem ke patton ka pani (woh pani jis mein neem ke patte ubalein gae hon), chawalon ki peach (chawal ubalne ke bad chalni kiya gaya pani) aur haldi ka pani shamil hai. Haldi ka pani banane ke liye pani mein haldi ka safof dal kar ese ubal liya jae.

Warning : This information is just for information and knowledge of medical care. Please contact your doctor for treatment.
 
© Copy Rights 2012 -1015     www.internetpk.com All Rights Reserved Contact Us